{الفكر القومي العربي} Fwd: ثورة حفر وتلزيق

---------- Forwarded message ----------
From: جحا الدمشقي <juhadamas@gmail.com>
Date: 2012/8/2
Subject: ثورة حفر وتلزيق
To:

في بعض الناس ما بدهم عنف.. ما بدهم ألفاظ نابية.. ولا ألفاظ غير مهذبة.. ولا بوستات طالع نازل.. ما بدهم مزح.. ما بدهم مسخرة.. ما بدهم سلاح.. ولا بدهم طوب وحجار.. ما بدهم فوضى ولا تخبيص.. ما بدهم عسكرة.. ولا سمسرة .. لابدهم جيش حر،ولا مجموعات مسلحة.. وما بدهم يشوفوا خلافات بين المعارضة.. ولا كل ساعة ينط له واحد عالقنوات يقطش ويلحش شي لا بينزان بميزان ولا بينكال بقبان!!

ما بدهم تدخل خارجي.. ولا داخلي.. ولا تدخل إلهي حتى!!

بدهم كي شي مخطط، كل شي منظم ومنسق.. وكل الناس اللي بالثورة فلاسفة ومفكرين..فهمانين وعارفين منين جايين ووين رايحين.. وكلهم ملتزمين مية بالمية بالسلمية وبخطة الثورة العدية.. وأخلاقها السامية.. وإذا ضربك الشبيح على الخد الأيمن تقول له: الله يسامحك ويهديك وتدير له الخد الأيسر.. وإذا صفقك عليه تقول له: لا تكون إيدك انوجعت يا أخي!!

والمعارضة تكون كلها كيان واحد.. أو تتوافق على كل شي.. ويكون فيه ناطق إعلامي واحد بيحكي وفق الاستراتيجية المتوافق عليها.. ولا بيشرق ولا بيغرب على كيفه!!

والعسكريين –إن وجدوا- يكونوا تحت أمرة القيادة الموحدة للمعارضة.. وينفذوا التكتيكات المتوافقة مع استراتيجتها.. بدون ما يخترقوا القوانين او يؤذوا المدنيين أو..

أنا بصراحة كتير بتعجبني هيك ثورة.. وإن شا الله وقت اللي بتصير أنا أول المندسين فيها

بس لو كان عندنا ربع هالمقومات اللي بدهم إياها ما كان حكمنا هيك نظام أربعين سنة!! وما كان فيه داعي للثورة من أصله

قيمكم من هدا الحكي اللي أثاره من جديد فيديو إعدام الشبيحة والبلبلة اللي ساواها.. وطبعا لأنه ما فيه أسهل من ضرب المثاليات من  كل الأطراف ابتدءا من الأمم المتحدة أنت نازل..

طيب أنا ما بدي قول لكم عن اللي ساويته الثورة الفرنسية من أخطاء وعنف وفظائع.. مع هيك لسى توصيفها بأنها من أعظم ثورات الحرية بالتاريخ البشري لأنكم رح تقولوا لي هدا حكي قديم

ولا رح أحكي عن الثورة البلشفية أو غيرها من الثورات.. لاء خلينا بالعالم اللي بيسمي حاله الحر وزعيمته أمريكا.. وقت اللي انضرب الأسطول الأمريكي من اليابان.. صار أحداث عنف وإجرام بكل انحاء الولايات المتحدة استهدف فيها مو بس اليابانيين!! كل مين عيونه بالطول أكل نصيبه.. وكان فيه عدد قتلى مو قليل.. وهدا يا ريت اشتفى قلبهم إلا بعدها رموهم بالنووي ومع هيك لسى بيدعوا انهم زعما الحرية.. وبعد احداث سبتمبر عارفين شو اللي صار..

وحتى الجيش الأمريكي اللي دخل بعدها لأفغانستان والعراق.. وهو جيش من المحترفين وبيخضعوا لتدريبات خاصة على قواعد الاشتباك والقوانين الدولية والمحلية.. شفتوا قديش كان عندهم تجاوزات وانتهاكات.. ولهلق امريكا ما بتوقع على اي معاهدة دولية ممكن تخلي عسكرها يخضعوا لمحاكمات خارج امريكا لانها بتعرف أنه ما خفي أعظم وبتعرف أنه جيشها عبارة عن بشر.. ما ممكن قولبتهم مها ساويت

حتى الإنكليز لما خسر فريقهم من كم سنة بمبارة كرة قدم  -بإيطاليا على ما اظن- ضل حدى من مشجعي الخصم ما أكل قتلة او تكسرت سيارته أو.. مشان مبارة!!!

يعني الشعوب لما بتكون مفجوعة بمصيبة ما بتتحاسب متل وقت يكون الوضع طبيعي

يعني أنا مابدي حدى يفهم إني عم دافع عن الأخطاء او الفوضى أو العنف.. بس أنا قصدي أنه الأمور ما نأخدها بمثالية.. ونحطها بسياقها الطبيعي والبشري.. وما لازم نحكم عليها من أحداث معينة أو انه نتشاءم أو نجلد الذات أو نحكم على المستقبل من خلالها..هي ثورة من صنع البشر –مو الملائكة- وفيها كل شي من طبائعهم وهدا كان طبيعة كل الثورات السابقة واللاحقة

لاء يا عمي ليش كمان عم نحجر عالمستقبل ونقول اللاحقة!! خلينا نكون متفائلين.. وأنا ببشركم إن شاء الله الثورة اللي بعد اللي جاية رح تكون ثورة مثالية متل ما بدكم تمام بالميلي.. يعني متل ما بيقولوا الشوام: "حفر وتلزيق"

 

--
You received this message because you are subscribed to the Google Groups "الفكر القومي العربي" group.
To post to this group, send email to alfikralarabi@googlegroups.com.
To unsubscribe from this group, send email to alfikralarabi+unsubscribe@googlegroups.com.
For more options, visit this group at http://groups.google.com/group/alfikralarabi?hl=en.