{الفكر القومي العربي} كفاية منك ما جرى -للشاعر : احمد عبد الحكم دياب

 

Subject: {الفكر القومي العربي}
Date: Tue, 20 Nov 2012 15:09:58 +0200

كفاية منك ما جرى

احمد عبد الحكم دياب

قلنا زمان لعصام شرف
لملم بضاعتك واستقيل
واليوم نقول ببكى وعويل 
يا عم قنديل
كفاية منك ما جرى
رفرف على النيل السواد 
والحزن كاسى المندرة

رجعتوا بالثورة لورا
اطفالنا ماتوا يا يهود
وجنودنا ماتوا ع الحدود
كفاية بطل مسخرة
تفتح مصانع مفتوحين 
وتزيد فى ظلم المظلومين
تحسب عيونا مغمضين
شوف يا ابن قنديل
ارجوك كفاية واستقيل
عايزين حكومة ناس تمام
مش مكلمة وغيطان كلام
عايزين حكومة تليق بمصر
مش شخاشيخ للفلول من كل عصر
عايزين رئيس وزرا حقيقى
مش شغلته تمام يا افندم 
وانتباه
وتعظيم سلام
شوف يا هشام
مصر كبيرة ومحتاجه لها ناس كبار
وانت وحكومتك مش كبار
انتوا حياله بوابين
واقفين على باب الجماعة مسلمين
مستنيين
سمعا وطاعة 
وابتسم
وامين .. امين
انتو سكرتاريه قديمة استهلكت
ومهما علينا اتنكت
او مصالح اللى جابها سلكت
برضو قديمة معفنة
ومعطنة
ولو قعدتوا 100 سنة
برضو حكومة منتنة
يا عم قنديل
ممكن تقول لى مين الكفيل
مين اللى عقدك مرمى عنده
مين اللى ساندك وانت سانده
مين اللى خاللى سينا خارج السيطرة
مين اللى محتل الجبال 
مين بيحكم فى العريش
والوادى مع جبل الحلال
مين اللى غطى ع الارادة
مين اللى فرط فى السيادة
ويقول صاحبى بلاش كلام 
دا الضرب فى الميت حرام
وانا بقول فى دول حلال
دول اللى قتلوا براءة الطفل الجميل
وموتوا الجندى النبيل
دول اللى سرقوا قوت ولادنا
دول اللى بيبيعوا فى بلدنا
دول العصابة اللى جدورها هناك بعيد
دول الاستدانة
والمهانة
والعفانة
والتخلف والجمود
طفوا الشموع
جلبوا الدموع
وحطموا عضم الضلوع
وكسروا الدفة وبيلموا القلوع
ويا عم قنديل 
انا برضو بأسأل ع الكفيل
مين الكفيل
يا عم قنديل الصبر غطاه العويل
فالحق بقى 
ولملم جماعتك واستقيل 
© 2012 

--
You received this message because you are subscribed to the Google Groups "الفكر القومي العربي" group.
To post to this group, send email to alfikralarabi@googlegroups.com.
To unsubscribe from this group, send email to alfikralarabi+unsubscribe@googlegroups.com.
For more options, visit this group at http://groups.google.com/group/alfikralarabi?hl=en.