{الفكر القومي العربي} نتذكر ناصر

 

د.مبروك حمدي يكتب :

لما تتكلم عن حصة مصر في ماء النيل اللي مستكترنها علينا دلوقتي وإثيوبيا رافضاها .. لازم تفتكر الراجل ده ...

اللي عمل اتفاقية 1959 لما كانت دول حوض النيل رافضين حصة مصر اللي كانت 48 مليار متر مكعب سنويا ومعتبرنها حصة ظالمة ومن مخلفات الاستعمار اللي عمل اتفاقية 1929 .. فاخد عليهم 7ونص مليار متر زيادة وخلى حصة مصر 55 ونص مليار متر مكعب سنويا وبدون مقابل الا تقديرا لدوره في دعم استقلال دول افريقيا ومساعدته لها بعد الاستقلال سياسيا وثقافيا واقتصاديا ولغاية النهارده بيقولوا عليه اب افريقيا وبيطبعوا صورته على العملات التذكارية وبتتسمى الشوارع والجامعات باسمه

الراجل ده .. عمل السد العالي اللي بجانب توليد الكهرباء وحماية قرى مصر من الفيضان المهم انه حماها من الجفاف وعمل بنك للمياه هو الاكبر في العالم وهو بحيرة ناصر اكبر بحيرة صناعية في العالم زودت حصيلة مصر اكتر من 164 مليار متر مكعب من المياه فوق ال 55 مليار حصة مصر من اتفاقية 59 واللي كانوا بيضيعوا في البحر بدون الاستفاده منهم .. وانقذوا مصر اكتر من مره في سنوات الجفاف اللي ضربت حوض النيل اكثر من مره

..

الراجل ده لما اخد لمصر نصيب الاسد من مياه النيل وعمل حصاله تخزن أضعاف الحصة دي في بحيرة ناصر مكنتش مصر وقتها محتاجه كل ده لان عدد سكانها كان بالكاد يصل ل 25 مليون لكن كان بيعمل ده للأجيال القادمه اللي بيشتموه دلوقتي.